February 23, 2018

KUAMAH THADAH OMLO HI.

Concept for procrastination and urgency with torn newspaper headlines excuses reading later, one day, tomorrow, someday, whenever etc

Tahuan lak ding na thasial hiam, zingsang lol ding na ngap kei hia, lupna tung pan thawh ding na lin hiam, nasep dingte kimangngilh bawl na zongsang hiam? Hun kiciantak zuzolo, kisil nangawn sawl denkei kul, hun zatzia ding gelsa dimdiam nei ngeilo, sep ding khat peuh a hun suansuan, a hun tun ding ciang bel  tualai pek in na sem khin kha leng, cih kisikna bel nei theizel sam.

Zing ciang pan bel tho baih in hahkat ta ning ci lua kisa, hun zat ding zia bang, mun khat ah suang lenlan, ahi zongin zuizo vetlo. Kha thak ni 1 ni lian panin hanciam ning ci ngitnget napi, a kha kik ciang kibang toto lai, kamciamna suan veve. Omdan ngeina lui nusia zolo khelah lua, naikal tampi beimang sak, lupna leh vante gentakloh omna peuh polhteh takin nungta, midangin hong sepsak ding ngak zawsop. A lo theilo ahih mahmah ciang bek a gamtang pan cih om thei hi.

Hih a tung a kigen khempeuh lak pan i nuntakzia tawh kibang a om khak leh kisaktheihna ding om vetlo hi. Kiliatsakna nusia ni. Hi bang thadahna pen sup dikdekna lampi a tawn suak dingte a ding bek ahi hi.

BANG HANG MIHINGTE THADAH HIAM?

  1. Lungsim ah a nuam ding bekbek dreaming/sunmang gelna tawh ngaihsutna nitum thei hi. Thupha kicing ngah ding a utlo kuamah omlo hi, ngaihsutna hoih leh muhkholna hiam mahmah kimlai thadahna in hong tuamcip ciang, sep ding lah peihlo semsem, deih lah hau semsem hi nuam mahmah hi.
  2. Tua nasep ding omte tawh kipelh theihtheihna ding lungsim a ngaihsun teta, sang naupangte in zingtawh baih, nisim sangkah ding, homework bawl ding, laisim leh lotngah dingte lin thei mahmah ta leh zong nu leh pate in thagum tawh hong pattah hong zongsatsak sawm tentan ciangin i khuak ah belh thei pan hi.
  3. Technology in hong thadah sak thei hi. A taktak in ci leng technology pen thagum nasepna hong dawn tuam, hun tawmno sung in baihzaw a tampi sep mengmeng theihna ding a kibawl hizaw hi. Inn sung ah tu kawm in i van deih peuh kawk a lei ziau, van thukhak, sum kikhaktuah, gamlapi a om tawh kimu ki-en kawm a kiho hun hi tamah hi. Tuhun in hih technology lo hong thadah sak thei ding tawm mahmah hi. Online a van zuakte in zong i thadah semsem na ding in, a leiding mite hong hoih bawl sawm tektek in, thatang khat zong i kikhiin kul nawn vetlo zah dongin hong mai-et den uh hi.

Hihte khempeuh in bawlhoih zawh nawnloh dingin hong thadah cip sak zo tam? Hi zenzen lo e, bang hang hiam cih leh, kimawl dingin kikuan zel, lawmte tawh vakkhawm, gualnuam in party bawl thei zel, khat veivei i duh ne, i deih en in zong kivak khia thei, i utna ah zong pai, i lawm leh gualte inn ah zong hawh zel hi hang. Hihte khawng ah bel thadah cih omlo in tawl huai ta leh zong nuam kisa zaw hi. Tua ahih manin thadahna i cih zong na khempeuh hih peihlohna hi khinlo hi. I peih leh peihloh pen i lungsim in na khentel dimdiam zaw tham hi. I nuntakna ah kiciantak in cimhuai i sakte ah kithadah hi. Nopna tawh kiton khawm pahpah lo, laisim, thatang nasep, kisinsakna tampi, pilna thukpi kanna te kithasial in, a nuam a olno nate lam bek kineh zaw hi.

Thadahna i cih pen, natna bang hilo a, pianpih mizia zong hi tuanlo in, paulap bekmah na hi pen hi. Thumantak in bel, lawhcin ding ut lua hi hang, ahi zong kithalawh peihlo hi. I lauh mahmah gamsa khat in i nung ah hong delh leh, tai ding leh tai loh ding ngaih sun man vetlo in sihlohna ding lungtang tawh kitai ding hi. Thadah takin tai ding cih pen tua hun lian ah kizang theilo ding cih i lungsim in theitel sitsit hi. I lawmngaihnu in kei bek inn ah om, hong cih leh pautam kullo, lupna pan leng khia, kisil in khu liang in a omna lam kizuan a, thadahna om vetlo hi.

Bang cik hun ciang kithadah hiam i cih leh a hun lemtang (convenient) i ngah ciang na hi sese hi. Suakta tak(freedom) in eima mimal deihtelna(choice) sungah thadahna piang hi. Nasepna ah tungsiah thupiak zui in naikal 5 sungin hih vaipuak na zawh ding hong kici leh, nasepna pan hong kikhawlsak ding lau in, paulap zong vetlo in kihanciam ding hi. Tua bang lian in, laihuan(exam) kipatma nitak hun hawmthawh luatna hangin deihtel theih hi nawnlo in sim mai kul ahih manin ki sim hi.

Sep ngap leh sep ngaploh ding deihtelna a omloh ciangin thadahna kigalmuh vetlo a, kua mah hong sawl hilo, eima a tektek ahih ciang bel zekaina leh peihlohna tawh gen mang kisawm hi.

Aman takpi in bel, kua mah thadah ki-omlo hi. I zawh dingin thupiakna leh aana a om nak leh a hun zui in kizen lua lel hi hang. Hong uk ding omlo,  mimal nuntakna ah in charge pen ei mahmah i hih manin i sepdingte kikin/ki-awlmawh khalo thei hi.

Matut zawh ding lunggulh takpi le hang citak takin kipan pah ding hi hang. Tua ahih kei leh i nuntakna a kisiasak nuam i hi hi. Social network ah ciakciak, lawmte tawh kiho den, naikal tampi online game kimawlna in zang bei, i tavuan taktakte zingciang thaiciang a dingin koihkoih i hih leh ei leh ei kikhemkhem suak hi hang. I nuntakna ki-uk zawh lohna pen khauhtak in aana tawh hong uk ding, hong makaih ding khat ngak gige i hih leh tua bang hun hong piang hetlo ding hi.

  1. Ka nuntakna pen kei khut ah om hi cih phawk phapha ni. Ei guak a om den i hih lam telcian ni. I pianpih sanggam i nu i pa i innkuanpihte pen hong thapia thei bek hi a, i lawmte in gualnopna ding ciang bek in hong zui na hi zaw uh hi. I lawhsap ciangin hong thuakpih thei bek hi uh a, amau bel na mainawt veve lel ding uh hi. I hanciamna pen ei khutsung bekmah ah om hi.
  1. I innkuanpihte in i lungkiat, i thalawp zawhloh lai in deihsakna tawh hanciam veve dingin hongsawl bek ngaklo in, a thupi penpen ei leh ei mah kitawsawn ding mangngilh ngeiloh ding i tahuan lianbel hi. I ihmut na pan thokhia in, i hun mawk beisaknate deihtak lungsim ah thangpaih sanin, i tupkhat i zawhna dingin ei leh ei kigawtbawl in sepzawh ding kipan ni. A kisap leh vai dangdangte hawhna-vakna te zong cancel ngam ding hoih pen hi. Peih keng hih dah mai ning i ci nawnlo in, lungsim kithuzawh in, eima deihtelna ah thadahna kihelsak nawn kei ni.
  1. I sep ding gegu pen bang hang a hun suansuan lai ding? Minute 10 break khit ciang kipan ning i cih bek leh zong, tua sung a online ah updates peuh wallpost comments etpakna tawh i hun sauzaw hong netum ding ze-et a tul za a sim thupiang in hong bawm luailuai den in tua lim tuamtuam a bawl companyte in zong i lungsim a luah zawhna ding mah in lunglut huai muhnop theithei ding leh i thadah semsem theihna dingin hong zolzol uh pen amau nasep amau sum zonna ahih lam tak i theih kilkel ciangin thupi nawnlo hi. Hihte hangin i hun le hi nuntakna kikhekzo sak kei ni. I siatlawh leh amau hang hilo in, en i data/internet pack seng liangin i lut(visit) hang hizaw hi. I hun i va beisakna pen ei khialhna ei supna hi den hi. Minute 10 bek hih video en ning i cih pen zuau hi, phone khoih zongsang(addict) bel hilo hing i cih zong i zuau mah hi.

Zing ciang panin pan taktak ta ning, kalkik panin pen pan taktak ta ning, ka kipat vanglak leh ka room ah kikhum cip in nikhat naikal 10 sung laisim ning i cihte zong ei leh ei kikhemkhem i hi hi. Ei leh ei kikhem in zuau tawh i kithuzawh ciang bangmah metna ding omlo hi. Kitaitehna ah gold medal la te in tukum sung khempeuh kha 3 sung bek kipractice a gold medal ka lak hi cih leh a thugen pen bawng-ek tawh kibang, training kici tua bang in piang ziau thei kei kici nuam ding hi. Tua bang mah in ei nuntakna ah zong bang hangin ei leh ei kikhemkhem sawm i hi hiam? I nuntakna pammaih lua hi, manpha lua hi. I nuntakna pen mi a dingin bangmah hi kei ta leh ei a dingin i neih manpha pen ahi hi. I hunte zek siam sawm ni, a manphatna i phawk loh ciangin, guallel kisakna lungsim piang pahpah hi.

Tu in kipan pah in, nuntakna ah i neih manpha pen hun(time) ahi cih thei in. Second khat kihal in midang khat in hong makhelh thei hi bang hang hiam cih leh hun zang khiallo mi tampitak om hi.

Be the first to comment

Leave a Reply

Your email address will not be published.


*