December 16, 2017

MICROCHIP IN SAPI NAMBAT HIPAH LO

Microchip pen Mangmuhna in a gen nambat 666 ahi hiam cih dotna tampi om aa, mi tampi in microchip pen 666 i cih sapi ciaptehna hi ding hi ci-in gen uh hi. Christian tampi te’n Microchip pen Mangmuhna 13:18 sunga kigen, Sapi ciaptehna hiding ci-in, a kigen manin, a lauthawng mitampitak om hi. Microchip pen, number 666 hi peuh mahlo hi. Ahi zongin, mailam hun ah mite hong control nangin, a kizang thei ding vanh khat cih theih a hi hi. 

MICROCHIP I NASEPZIA LE AKIZATZIA

Microchips pen information technology vanzat kitangsam mahmah khat ahi hi. Computer engineer leh IT scientist te bangin a tuamtuam nam tampi bawl khia uh hi. Microchip i khut vun sungah kikoih henla scan tawh hong ki-en leh, ei ii tangthu a kiguang khempeuh baihno takin, computer sungah hong kilangh khia pah ding ahi hi. Tua banah, i omna mun koi lai hiam cih zong, Global Position System (Kawlgam ah zong) a zang tam mahmah ta hi. Phone leh Mawtaw tungah kiguan setvan neuno khat hi-in, i pai ngei loh, i theih ngei nai loh mun khatah kuama hilh kul lo-a, hong hilh thei) zangin hong kikan thei ding ahi hi. Tu aa i zat handphone-te, bankcard-te sungah zong microchip a kizangh hi aa, i omnaa, i phone zatna, i bankcard zatna munmun hong ki thei pah lianlian hi. 
New World Order a kici One World Government le economic system hong tun’ tak ciangin, bandcardte, handphone tawh limtakin, hong kigaakcip thei ding ahi hi. Vanleina, vanzuakna cihte ah controlna baih mahmah ding hi. Tun Kawlgam ah Ayewady Bank te in sum lei sum zuakna ding, phone ahih kei leh bank card ki zangh thei dingin code number bek zangta uh hi. Tua tungtawn Mobile phone panin van kilei , sum kikhak thei ziau hi. Bank pan, sum leitawi nading nangawn, SMS (text message) tawh ki lei tawi thei hun hi ta hi. Na khempeuh sungah chips kilim zat mahmah ta cih na ahi hi. 
Hih nambat 666 pen mi pawlkhat in buaipih mahmah uh hi. Hih banga nambat 666 a buaipih le a laute misiam ten natna nam khat a vei-in ngaihsun uh hi. Tua natna min pen Hexakosioihexekonta hexaphobia (fear of number 66, nambat 666 lau natna) ci uh hi. Hih natna dam nadingin zatui Pianthakna sim loh zatui dang om lo hi. 
MICROCHIP’ NASEPZIA: 

RFID pen Radio Frequency Identification cihna ahi hi. RFID chips pen electronics vanzat kitangsam mahmah khat ahi hi. Security lam tawh kisai gentehna-in sum tawh kisai (financial) identification le a dang tampi ah kizang hi. Hih electronic chips pen neu mahmahin buhtang cia khawng bek pha hi. Ahizongin a sungah unique verification nambat om hi. Property scanner tawh a ki scan ciangin hih chips in scanner ah ID nambat na puak hi. Hih ID nambat tawh kituak set ahi zongin, mihing le ganhing ahi phial zongin computer server liante ah network hiam internet hiam zangin olno takin kizongkhia thei hi. Tua ahih manin mi khat peuh in ID nambat a neih a, computer server khat peuh a mau tangthu kim (Personal Database) a neih naak leh, sum tawh kisai khempeuh le ama tangthu khempeuh olno takin kizong khia mengmeng thei hi. RFID Chips nam nih om hi. Khat pen Active RFID hi-in a khat zaw pen Passive RFID ahi hi. Active RFID Chips ah battery neucik lithium, CMOS cihte hi. Hih battery in chips sunga microchips’s circuitry ah (mei pia) power supply hi. Chips scanner ahih keileh, chip reader ah signal khak mengmeng thei lai hi. 
Passive RFID in bel battery nei lo-in Chip reader a power zang hi. Barcode le ATM cardte Passive laka akilang pawl ahi hi. Leitung gam 25 valah hih dan mimal identification programs kizangta hi. United States le Cananda ah kinaak zat peuhmah hi. Hih dan RFID lakah mi pawlkhat in sahang nambat dan-a a ngaihsut uh Multiple Micro Electrode Array (MMEA) zong kihel hi. Ki-at (Surgical operation) tawh olno takin mihing khuak le taksa mundante ah olno takin kikoih thei hi. Hih dan set mihing pumpi ah kiokoih hi leh mi khempeuh computer khat mah bang ding hi. Nambat (Digit) 18 nei IP neih hun hong tung ding hi. Hih 18 pen mi tampi 6 + 6 + 6 = 18 danin ngaih sunin nambat 666 piangsak uh hi. 
Tuhun ciang Sattellite le Landline links tampi omta hi. Radio frequency banah RF transmitter le receiver a om naak leh information kikhak sawn haksa nawnlo hi. Tua ahih manin RF transmitter dinga mihing zat theih dingin kibawl mah hi. Ahi zongin Pasian thu zui thu um te adingin hih dante lau ding hi zenzen lo hi. Mi pawlkhat in thei cianlo ahih manun mawk lau thei uh hi. Mawtaw, cycle nambat 666 nei tampi om hi. Inn nambat 666 nei tampi om hi. Simcard tungah nambat 666 kisuang tampi om hi. Tuate Sapi’ nambat 666 kici thei lo hi. 
NUMBER 666 IH CIH

Hih Sapi nambat i cihcih pen, i vanhzatte’ nambat hi zenzen lo hi cih pen, Lai Siangtho in siangtakin hong gen hi. Mihing ii nambat hi zaw hi. Mihing cih zong pen, min le za, title hi zaw lailai hi. Min le nambat kituak ahih manin sapi nambat kici thei pah tuan lo hi. Sapi hong piankhiatna, a khanzia, a sep ding khempeuh kamsangte in genkhol khin hi. Tua Sapi in kumpite’ kumpi maw, topate’ Topa maw, Zeisu zalaih pa maw? Pasian ii title a deih gawh pa, Pasian’ zaa a sutnuam pa i nambat ahi hi. 
Pasian’ zaliatna, thuneihna a sutnuam pa, Satan Dawimangpa ahi hi. Anti-Christ kici hi. 

1. Hih Anti-Christ in leitung mite, Biakna min, Pasian min paulapin hong kilom khat, hong kipumkhat sak ding hi. Ki-tna, Kipumkhat theihna pen, Pasian Nipi Ni … (atuh) ahi SUNday ni zatkhopna tawh, leitung mite hong guam tuah ding ahi hi. Christian lote in zong, tua upadi law pen zuih ding baih hong sa mahmah lel uh hi. Pasian Nipi Ni ahih leh Sabbath Ni, Saturday ni a hi hi. Daniel 7:25 Anti-Christ in, Pasian thukham, Ni leh Hunte khelsak ding ngiimna nei hi, ci-in hong hilh hi. (Eze 20:20) Sabbath ni pen, Topa le a mite kiciaptehna Ni hi. Eph. 1:13 Zeisu a it te, thukham a zuite hi aa, Khasiangtho in ciaptehna pia beh lai hi. John 14:15 Sabbath pen, mihingte a’ ding a kibawl ahi hi. Mark 2:27 Topa Zeisu pen Sabbath i Topa hi. Mark 2:28. Tua hi leh ei Christiante in, Sabbath ii Topa ahi Zeisu pen Topa leh a tate kiciaptehna ni Sabbath ni mah aa i biakciang, Pasian tate taktak ci-in ciaptehna kingah pan ding ahi hi. 
2. Matt. 28:1 Nipikal khat sung, Sunday pan Friday Ni zong, nasepni hi. Ni sagih Ni. Sabath Ni ahih le Pasian tawlngak Ni hi aa, Mihingte’ tawlngak ni dingin hong bawlsak ahi hi. 
3. Anti-Christ ii tuu le tate in, damdamin SUNday ni tawh nasia tak in kipumkhatna hong laa ding uh hi. 
4. A nungta Pasian ii tuu le tate in, damdamin Saturday Sabbath ni tawh kipumkhatna hong laa ding uh hi. Tua laitakin, Satan in Pasian’ tate tungah, hehlua-in galdo in hong kuan ding hi. (Rev. 12:17) Thukham kiptak khotak a leen, a beibang thuman pawlpite tungah, Satan hehlua hi. Tua thukham number 4 na pen, amuhdah penpen hi lai hi. A hang pen, Sabbath in, Topa le a Tate kiciaptehna ni hi. 
5. Satan in zong, amah le a tate kiciaptehna nading aman lo counterfeit Sabbath ahi SUNday, leitungah hong phuankhia hi. Nimrod kumpipa hun panin, ni biak ni-in, SUNday hong popular mahmah ta hi. Tua pen, Romans Empire hong thahaat mahmah laitakin, Constantine kumpipa in Anti-Christ ii khutzat le huzaap tawh, Sabbath Topa Nipi Ni pen, Sunday tawh hong khelsak ahih manin, Christian a tam zawte in Sunday zang uh hi. Dawi mangpa in, gual zo kisa kha ding hi. Ahi zongin, a tawpna thukhen ding pen, Pasian mah hi. 
Sapi nambat a nei lote in van lei thei lo ding, van zuak thei lo ding hi, ci hi. (Mang 13:17). Microchip nei lote in van lei thei lo, van zuak theih loh hun hong tung ken teh kici thei lo hi. Bang hang hiam cih leh, internet, phone vive hunah, sum tang zang nawn lo-in credit card bek kizatna mun tam semsem ta hi. Kawlpi ah zong credit card bek a zang kitam mahmah ta hi. Microchip tungah nambat 666 tuangsak uh a, tua microchip tawh van lei, van zuak thei ahih manin, “Sapi nambat hi” ci-in upna ding thu om peuh mah lo hi. 
Mang. 13 sunga “Sapi nambat 666 le microchip tunga nambat 666 kisai kha peuhmah lo hi. Lai Siangtho ii gen bang hiam ci-in kan phat huai hi. Dawimangpa in hun tomno khat bek nei lai ahih lam thei ahih manin, nakpi takin nasem a, mite’ up theihtheih ding van zat tuamtuam hong zang hi. 
Mi tampi in Dawimangpa’ thu a up khak manun tawntung siatna a tung ding uh hi lo zaw in, Pasian’ thuman thutak a up loh manun a thuak ding uh hi, ci-in genkholhnate in hong hilh hi. 
Mang. 12:14; 22:14 nasim beh in. Pasian thukham a zuite, apuan a siangtho sakte nuntakna singgah ciamkha ding hi. Mi Siangthote la ding bekin Topa Zeisu hong pai ding hi. Misiangtho i cihte a kuate hiam? Mawhna a bawl ngeilote maw? Hi zenzen lo hi. Amawhna a nusiate hi. Zeisu sisan tawh siansuahna angahte bek hi. Mawhna kissik kik aa, mawhna i nusiat ding ahi hi. Zeisu sisan in i mawhnate hong sawp siangsak thei bek hi. 
Tua ahih leh mihingte a siangtho-in, kinungta thei maw? Lai Siangtho in mihingte a siangtho in, i nuntaak ding deih lua hi. Kinungta thei lua hi. 1 Peter 1:16. Mimawhte, 1 John 3:4 Thukham palsatte, vangam tunglo ding hi. Thukham zuite, mawhna kisiik kik aa, mawhmaisakna Zeisu kiangpan angah aa, a siangtho-in anungtate bek …gupkhiatna saang ding hi. 
Microchip hilo, Sapi’ nungzui loh nading leh Tuuno nungzuihna pan lampial khia lo ding in Kha Siangtho in hong makaih tawntung ta hen!. 
Source : Dr. Mungpi

Be the first to comment

Leave a Reply

Your email address will not be published.


*