October 24, 2017

TU HUN CIANGIN ZUAU TAM A KIGEN PENNA MUN LEH I ZAKNA MUNTE

1. Pulpit tungah: Sia ten amau zuih zawh loh teng hong gen khum dupdup den keei uh hi. Satan zong na nuih kauhkauh napi mipi ten bil ngong dek liangin na kingaih khiatsaksak zaw lai se. I zuih zawh loh ding thu peuh awng liangin kam bembem Amen na kici lala zaw lai.2. Election neih dek ciangin: Politician ten a sep loh ding thu teng peuh uh suang lot bangin hong ciam khumin hong lot khum ziahziah uh hi. Lui leh guam om lohna mun peuhah Lei (bridge) hong bawlsak ning peuh ci-in hong ciam zanzan uh… Mipi ten na ki-um mahmah zaw lai… Pawl khatin gum lua kisa a hihna uh a genciante peuh a demdem/a elel suaksak zawsop lai… Kiteel ciangin hong cing zaw lai dep phiangsan uh.

3. Sanginn ah: Parents Call hun ciangin Sangsia ten a tate uh a uk zawh loh uh hang nu leh pate kiangah, “Na tate nangawn uh uk zo lo liang maw?” cih khum zialzial in, tate kep ding dan thuhoih nono teng peuh nu leh pate gen khum daldal se. Nu leh pa ten um mahmah zaw lai. Inn a tun uh ciangin ta ten ciangduai nek lawh liang…..

4. Innsungah: Nu leh pate pen tu hun ciangin a tamzawte a nu leh pate’ thu na mang lo hi napi un tate tungah nu leh pate’ thuman nah lawhpeek cih gen belin nei uh hi. LST Efesa 6:1-3 sunga “Tate aw, na pate uh thu na man ding uh Khristian ngeina hi a, ahi ding mah ahi hi. Thu piakna a lian khat in, ‘Na nu leh pa zahtak in,’ cihna hi. ‘Zahtak lecin nang adingin thu hoihin, leitungah na khan a sau ding hi,” na ci pah hi…cih teng bek bang sim mun mahmah in, thuhilhna dingin zang mun mahmah napi un Efesa 6:4 “Pate aw, na tate uh a heh theihna dingin bawl kei un la, Khristiante ngeina tawh kituakin tai-in, hilhin pattah un,” a cihna teng sim nuam ngei vet se lo citciat uh hi.
5. Nungak leh tangvalte helna ah: I deihte i ngah nuam luat manin ngaih nang tawh om leng ekbuk zong nuam e khawng peuh ci daldal liang. “U aw,nau aw nang bang sepna nei,?” kici leh buaih (dgree) min paa sak muam kisa MBBS, FB Admin, Tempongzang University ah degree man lian khawng peuh ci suk phalphal, khat leh khat thugen ki-um tuak mahmah, kimuang tuah mahmah zaw lai… Zan khat kiteng, khuavak ma-a kikhen kik ziau. 

SEP KHIATNA OM LO UPNA PEN A SI HI A CIH MAH BANGIN ZUIH ZAWH/HIH ZAWH LOH TENG GENGENNA ZONG A MAWKNAPI MAH HI A, HUIHPI NUNG DELHPA TAWH KIBATNA HI.

# Kuamah ka kawktuamna nopna leh minpi ka lawh nop man hi peuhmah lo a, mihing i hihna tawh sisan tawh kinungta kim tek lai ahih manin leitungah a citak zo leh a thuman zo ki-om vet lo hi cih nopna leh a kigen khempeuh leh thu i zak peuhpeuh up khit pahpah ding hi nawn lo hi cih nuamna hang ahi hi. Ei phattuamna ding leh hoihna dingte zong zui/um kei ni cihna hilo hi.

Khialhna lianpi tawh.

Lungdam.
Tklyant.blogspot.in

1 Comment

  1. Ka kupnop #1 pen: Pastor te hi in siate hile kuamah a cing sinsen ki omlo hi. Pulpit a na gen khempeuh nang zuihzawh vive hi in “Tua kong gen bangin gamta un, ka zuihzawh vive hi” cici lecin kuaman na thu ong ngai mello ding a, Farisai ong cihsan lel ding hi. Genkhelh a omle ngaihdam

Leave a Reply

Your email address will not be published.


*